მისი ხმის სიკასკასე გამახსოვრდება ყველაზე მეტად. ბედნიერების ნაკადული ამოუდის ხმით და სიცილით ისე, თითქოს დაბადებიდან სულ მზის სხივმა მოაცილა აქამდე, არც დარდი ქონია და არც საზრუნავი... თითქოს. გადამდებია მისი მხიარული რიტმი, მაჟორები, მისი დაუმორჩილებელი ხასიათი, რომელიც ამ ბედნიერების ბგერებში შეიძლება თავიდან ვერც შენიშნო. არადა, შინაგანი სიმტკიცეა ის, რაც ასე ელავს და გიზიდავს ციმციმა თვალებით ალაპარაკებულ ლამაზ სახეში.

ჩვენი ბლოგი ერთ ბრჭყვიალა გოგოზე გიყვებათ, რომელსაც პატარა ქალაქში რამდენიმე უცნაური თავგადასავალი გადახდა და ახლა ზღაპრის გმირივით კეთილ ადამიანებთან ცხოვრობს, ბისერებით და ფერადი ბროლის ნამსხვრევებით აგებულ მისი ოცნების სამყაროში.

ამ უცნაურ ურთიერთობებს პირველად მამამ მიაქცია ყურადღება. ქუჩაში შემთხვევით შეხვდა მის ახლადდაოჯახებულ გოგოს და მშობლიური მოკითხვის დროს ტელეფონმა დარეკა. დედამთილი იყო. უცნაური დაძაბულება დაეტყო გოგოს და ტელეფონშიც მკაცრი ხმა, მკაცრი ტონი ისმოდა. მამა, შვილის ამღვრეულმა თვალებმა და “გამომცდელის” კითხვებზე დაბნეულმა პასუხებმა გააკვირვა. კიდევ უფრო გაოცდა, როცა მიხვდა, რომ დედამთილს იმას უმალავდა, მშობელი მამა რომ შეხვდა ქუჩაში და რამდენიმე წუთით ამ მიზეზით შეყოვნდა.
ამ დღიდან დაწყებული, გოგოს მშობლებმა შვილის ხშირი მონახულება დაიწყეს ახალ ოჯახში და მათი ეჭვიც მალევე გამართლდა. სიცოცხლით სავსე გოგოს, ნელ-ნელა ეცვლებოდა გუნება, სევდა ემატებოდა. საუბრებს მალევე ამთავრებდა და სახლში საქმეს იმიზეზებდა. ერთხელ, თვალებდაწითლებულს სახეზე ცემის კვალიც შეატყვეს და იქაურობის დატოვება კატეგორიულად მოსთხოვეს.

ამის შემდეგ ახალი ცხოვრება დაიწყო... ჩააბარა უნივერსიტეტში და დაიწყო სწავლა სხვა ქალაქში უმცროს დასთან ერთად. სწავლობდა მისი პრობლემისგან ყურადღების გადატანას, საყვარელი საქმეების კეთებას ისეთი სიხშირით, რომ ცუდზე ფიქრისთვის და დეპრესიისთვის არ მიეცა გზა. ამ დროსაც მისი ოჯახის წევრები იყვნენ ყველაზე აქტიური მხარდამჭრები. წლების შემდეგ დავბრუნდი მშობლიურ ქალაქში, სადაც სწავლაც გააგრძელა და ახალი ჰობიც შეიძინა. ნუ, თავიდან ეგონა ჰობი. არადა, ნამდვილ ოსტატად ჩამოყალიბდა. ამასობაში უკეთილშობილესი ახალგაზრდაც გაიცნო და შეუყვარდა. უკვე 8 წელია ერთმანეთს გვერდით უდგანან და ნელ-ნელა, სიყვარულით და მზრუნევლობით აშენებენ საკუთარ ბედნიერებას.

ქალთა ფონდ “სოხუმმა”, მოქარგა, საბოლოო ორგანიზება გაუკეთა ყველაფერს მის ცხოვრებაში: ტონუსი მისცა მის ჰობს - საქმიანობას, შემოქმედებით უნარებს, დედობას და ოჯახში ახალი ენერგიით მნიშვნელობასაც კი. ყოველდღიურად სიახლეების ძიების, ზრდის და წინსვლის მოტივაცია გაუზარდა, საკუთარი გამოცდილებაც სხვებისთვის აუცილებელ მაშველ რგოლად გარდაუქმნა და ჩვევად უქცია ფონდის ყველა რესურსის - ფსიქოლოგის, სოციალური მუშაკის, იურისტის რჩევების, ეკონომიკური გაძლიერების პროგრამების სწორად მიღება და გამოყენება. ფონდის სახელით მიიღო კონკურსში მონაწილეობაც და მცირე გრანტით საკუთარი ბიზნესი გააძლიერა.

დღეს სხვას ქალებს ასწავლის პრობლემებიდან თავისდაღწევის და გამკლავების ჯადოსნურ გზას. მართლა ზღაპრის გმირივით დადის თვითონაც ადამიანებს შორის და ბედნიერებას ანაწილებს ფერადი, საოცარი ქმნილებებით. ახლა სხვებს უზიარებს იმის დაფასების ნიჭს, რაც ბედმა მოგცა და შენ უნდა გაამრავლო, გააფერადო!

ჩვენმა “ბრჭყვიალა გოგომ” იცის, რა უდიდესი მნიშვნელობა აქვს “სოხუმის” მსგავსი ორგანიზაციების არსებობას არა მხოლოდ ქალების გაძლიერების, არამედ ყველა იმ ადამიანის ბიოგრაფიის სრულყოფისთვის, რომლებსაც ქალები, - დედის, ცოლის, თანამშრომლის, მეგობრის ან უბრალოდ, მზრუნველის პოზიციიდან ეხებიან. ასეთი ორგანიზაციები სწორი განათლებით და სტრატეგიით, ადამიანებს ჩუქნის გამბედაობის ძალას, - დამოუკიდებლად გაიაროს გაუკვალავ გზაზე, სადაც საკუთარი წარმატების ჯადოსნური კარი იხსნება!